အကြမ်းဖက်မှုတွေ၊တခြားဆက်စပ်မှုတွေနဲ့ ပတ်သက်ပြီး အကြမ်းဖက်မှု တိုက်ဖျက်ရေး ဥပဒေ ပုဒ်မတွေနဲ့ ကိုဖြိုးဇေယျာသော်နဲ့ ကိုကျော်မင်းယု ခေါ် ကိုဂျင်မီတို့ကို ဒီကနေ့ သေဒဏ်ချမှတ်လိုက်တယ်လို့ စစ်ကောင်စီက ကြေညာပါတယ်။
သူတို့ကို စစ်အုပ်ချုပ်ရေး စစ်ခုံရုံးဖွဲ့ စစ်ဆေးပြီး အကြမ်းဖက်မှု တိုက်ဖျက်ရေး ဥပဒေ ပုဒ်မ ၄၉(က)၊ ၅၀(စျ)၊ ၅၀(ည)တို့နဲ့ သေဒဏ်ချမှတ်ခဲ့တာ ဖြစ်တယ်လို့ အဲဒီသတင်းမှာ ဖော်ပြထားပါတယ်။
ကိုဖြိုးဇေယျာသော်ရဲ့ နေအိမ်တွေလို့ဆိုတဲ့ သင်္ဃန်းကျွန်းမြို့နယ်တွင်း နေအိမ်နှစ်အိမ်မှာ လက်နက်ခဲယမ်းတွေ ရှာတွေ့မိခဲ့သလို ကိုဂျင်မီကို ဖမ်းမိခဲ့တဲ့ ဒဂုံမြို့သစ်မြောက်ပိုင်းမှာလည်း လက်နက်ခဲယမ်းတွေကို တွေ့ရှိခဲ့တယ်လို့ စစ်ကောင်စီရဲ့ ထုတ်ပြန်ချက်မှာ ပါရှိပါတယ်။
သူတို့နှစ်ဦးဟာ ရန်ကုန်မြို့တွင်း ပစ်ခတ်ဖောက်ခွဲမှုတွေလုပ်ဖို့ လှုံ့ဆော်ခဲ့သလို မြေပြင်မှာလှုပ်ရှားနေတဲ့ ဒေသကာကွယ်ရေးတပ်ဖွဲ့တွေအတွက်လည်း ငွေကြေးထောက်ပံ့မှုတွေ ရှိတယ်လို့ စစ်ကောင်စီဘက်က စွပ်စွဲပါတယ်။
၈၈ မျိုးဆက်ကျောင်းသားခေါင်းဆောင်တဦးဖြစ်တဲ့ ကိုဂျင်မီကို အောက်တိုဘာလ ၂၃ ရက်နေ့မှာ စစ်ကောင်စီဘက်က ဖမ်းဆည်းခဲ့ပြီး အမျိုးသားဒီမိုကရေစီအဖွဲ့ချုပ် NLD လွှတ်တော်အမတ်ဟောင်း ကိုဖြိုးဇေယျာသော်ကိုတော့ နိုဝင်ဘာလထဲမှာ ဖမ်းမိခဲ့တာပါ။
ကိုဂျင်မီနဲ့ ကိုဇေယျာသော်တို့နှစ်ဦးကို စစ်အုပ်ချုပ်ရေးကြေညာထားတဲ့ မြို့နယ်တွေမှာ ဖမ်းမိခဲ့တာဖြစ်လို့ စစ်ခုံရုံးဖွဲ့ စစ်ဆေးကာ သေဒဏ်ချမှတ်လိုက်တာဖြစ်တယ်လို့လည်း ဆိုပါတယ်။
စစ်ကောင်စီဘက်ကတော့ သူတို့နှစ်ဦးကို ဘယ်မှာထိန်းသိမ်းထားလဲဆိုတာ အတိအကျ ပြောဆိုခဲ့ခြင်းမရှိပေမယ့် မြန်မာနိုင်ငံမှာ သေဒဏ်အမိန့်တွေကို ကွပ်မျက်မစီရင်တာ အချိန်အတော်ကြာပြီလို့ ဥပဒေရေးရာ ကျွမ်းကျင်သူတွေက ပြောပါတယ်။
သတင်းရင်းမြစ် – ဘီဘီစီမြန်မာ