နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ လုံခြုံရေးအရာရှိ တာဝန်ထမ်းဆောင်ခဲ့သူ ဒုရဲအုပ် ချယ်ရီထက်အပေါ် စွဲဆိုထားတဲ့ ပုဒ်မ ၅၀၅-က အမှုကို ဒီကနေ့ ဇန်နဝါရီ၂၀ရက်မှာတော့ ပြန်ခေါ်သက်သေဖြစ်တဲ့ ဇမ္ဗူသီရိမြို့နယ်ရဲစခန်းက အမှုစစ်အရာရှိ ဒုရဲအုပ်ကျော်နိုင်ဦးကို စစ်ဆေးဖို့ရှိနေပါတယ်။
ပြီးခဲ့တဲ့အပတ်က အဲဒီအမှုကို စွဲချက်တင်ကြောင်းနေပြည်တော်ထောင်တွင်းတရားရုံးက အမိန့်ချမှတ်ထားတာပါ။ တရားရုံးရဲ့ စွဲချက်တင်မှုအပေါ်မှာ စွပ်စွဲခံရသူမချယ်ရီထက်ကတော့ သူ့မှာအပြစ်မရှိကြောင်းထွက်ဆိုထားပါတယ်။
အဲဒီလို တရားရုံးက စွဲချက်တင်ကြောင်းအမိန့်ချတဲ့အတွက် စွပ်စွဲခံရသူရဲ့ရှေ့နေတွေဘက်က ပြန်ခေါ်သက်သေတွေကို စစ်ဆေးရတော့မှာဖြစ်ပါတယ်။ ဒါ့ကြောင့် ဒီကနေ့မှာတော့ မချယ်ရီထက်ကိုထိန်းသိမ်းတဲ့နေ့က သက်သေအဖြစ်သိမ်းယူခဲ့တဲ့ မချယ်ရီထက်ရဲ့မိုဘိုင်းဖုန်းက အွန်လိုင်းသုံးစွဲထားတဲ့မှတ်တမ်းကို စီအိုင်ဒီကနည်းပညာပါရဂူရဲ့ စစ်ဆေးချက်အပေါ် အမှုစစ်ရဲအရာရှိအနေနဲ့ဘယ်လောက်သိရှိထားလဲဆိုတာကို စွပ်စွဲခံရသူ မချယ်ရီထက်ရဲ့ ရှေ့နေတွေဘက်က ပြန်ခေါ်စစ်ဆေးမှာဖြစ်ပါတယ်။
အဲဒီအမှုမှာ တရားလိုဘက်က ရဲတပ်ဖွဲ့ဝင်အများစုပါတဲ့ တရားလိုပြသက်သေ ၆ ဦးအထိ တင်ထားတာဖြစ်တာပါ။ ဒုရဲအုပ် ချယ်ရီထက်ဟာ ပြီးခဲ့တဲ့ စက်တင်ဘာလက နေပြည်တော်မှာ ဖမ်းဆီးထိန်းသိမ်းခံခဲ့ရတာပါ။
မချယ်ရီထက်ဟာ သူ့ရဲ့လူမှုကွန်ရက်စာမျက်နှာမှာ ဒေါ်အောင်ဆန်းစုကြည်ကို သတိရကြောင်း ရေးသားခဲ့မှုနဲ့ ပြီးခဲ့တဲ့နှစ် ဇွန်လက အမျိုးသား ဒီမိုကရေစီအဖွဲ့ချုပ် NLD ပါတီရဲ့ ဘီးလင်းမြို့နယ် လွှတ်တော်အမတ် ဒေါ်သီရိရတနာကတောတွင်းစခန်းချနေတာတွေ၊ လက်နက်ကိုင်ဆောင်တဲ့ မှတ်တမ်းဓာတ်ပုံတွေနဲ့ အမျိုးသား ညီညွတ်ရေးအစိုးရ NUG ရဲ့ သတင်းထုတ်ပြန်ချက်တွေကို မချယ်ရီထက်ကိုအွန်လိုင်းကတဆင့်ပေးပို့ခဲ့တာ ( ပေးပို့မှုအပေါ်မချယ်ရီထက်က တုံ့ပြန်မှုမရှိခဲ့) တွေကိုလက်ခံထားတယ်ဆိုတဲ့စွပ်စွဲချက်တွေနဲ့တရားစွဲဆိုခံထားရတာပါ။
လက်ရှိမှာတော့ မချယ်ရီထက်ဟာ ရဲတရားရုံးကနေ ချမှတ်ထားတဲ့ ရဲဝန်ထမ်းဆိုင်ရာဥပဒေနဲ့လည်း ထောင်ဒဏ်သုံးနှစ်ချမှတ်ခံထားရတာဖြစ်ပါတယ်။
သတင်းအရင်းအမြစ် – ဘီဘီစီမြန်မာ