ကယားပြည်နယ်တိုက်ပွဲကြောင့် ဝန်ကြီးချုပ် ဟွန်ဆန်ရခဲ့တဲ့ တိုးတက်မှု ထိခိုက်တယ်လို့ပြော

ကယားပြည်နယ်မှာ ဒေသကာကွယ်ရေးတပ်ဖွဲ့ဝင်တွေနဲ့ စစ်ကောင်စီတပ်တွေကြား ဖြစ်နေတဲ့ တိုက်ပွဲတွေကြောင့် အာဆီယံအလှည့်ကျ ကမ္ဘောဒီးယားဝန်ကြီးချုပ် ဟွန်ဆန်ရဲ့ မြန်မာနိုင်ငံခရီးစဥ်အတွင်း ရရှိခဲ့တဲ့ တိုးတက်ဖြစ်ထွန်းမှုကို ထိခိုက်စေတယ်လို့ ကမ္ဘောဒီးယားနိုင်ငံခြားရေးဝန်ကြီးဌာနဘက်က ပြောပါတယ်။

ဝန်ကြီးချုပ်ဟွန်ဆန်ရဲ့ ခရီးစဥ်အတွင်း အမျိုးသားပြန်လည်သင့်မြတ်ရေး၊ အားလုံးပါဝင်တဲ့ ငြိမ်းချမ်းရေး၊ တည်ငြိမ်အေးချမ်းမှုနဲ့ ဖွံဖြိုးတိုးတက်မှုကိစ္စတွေကို ဆွေးနွေးခဲ့တယ်လို့လည်း ဆိုပါတယ်။

ကမ္ဘောဒီးယားနိုင်ငံရဲ့ ငြိမ်းချမ်းရေး လုပ်ငန်းစဥ်ကနေ ရရှိခဲ့တဲ့ သင်ခန်းစာတွေကို ထောက်ပြပြီး မြန်မာနိုင်ငံရဲ့ ငြိမ်းချမ်းရေးနဲ့ အမျိုးသားပြန်လည်သင့်မြတ်ရေးလုပ်ငန်းစဥ်ဟာ သက်ဆိုင်သူတွေအားလုံး ညှိနှိုင်းဖို့ သဘောတူညီမှုတခု မရဘဲ အပြည့်အဝ ပူးပေါင်းဆောင်ရွက်မှု မရှိရင် အောင်မြင်နိုင်မှာ မဟုတ်ဘူးဆိုတာကိုလည်း အလေးပေး ပြောကြားခဲ့တယ်လို့ ဆိုပါတယ်။

လွိုင်ကော်မြို့မှာ တိုက်ပွဲတွေ ပြင်းထန်နေမှုတွေအပေါ် အင်မတန် စိုးရိမ်မိသလို နိုင်ငံတွင်းမှာ ငြိမ်းချမ်းရေး ပြန်လည်ဖော်ဆောင်နိုင်မယ့် အခြေအနေတွေကို ဖြစ်ထွန်းစေမယ့် တွေ့ဆုံဆွေးနွေးမှုတခု ပေါ်ပေါက်စေဖို့အတွက် သက်ဆိုင်တဲ့ အဖွဲ့အစည်းအားလုံးက အပစ်အခတ်ရပ်စဲဖို့၊ အကြမ်းဖက်လုပ်ရပ်တွေအားလုံး ရပ်ဆိုင်းဖို့လိုတယ်လို့လည်း ကမ္ဘောဒီးယားနိုင်ငံခြားရေးနဲ့ နိုင်ငံတကာပူးပေါင်းဆောင်ရွက်ရေး ဝန်ကြီးဌာနက ဇန်နဝါရီလ ၂ဝ ရက်နေ့မှာ သတင်းထုတ်ပြန်ထားပါတယ်။

ကယားပြည်နယ်က တိုက်ပွဲတွေအတွင်း စစ်ကောင်စီဘက်က လေကြောင်းကနေ ပစ်ခတ်တိုက်ခိုက်တာတွေ ရှိနေတာကြောင့် စစ်ရှောင်ပြည်သူဦးရေလည်း တဖြည်းဖြည်း တိုးလာနေပါတယ်။

စစ်အာဏာသိမ်းပြီးနောက်ပိုင်း ပေါ်ပေါက်လာတဲ့ မြန်မာ့နိုင်ငံရေးအကျပ်အတည်းကို ချက်ချင်းဖြေရှင်းနိုင်မှာ မဟုတ်သလို ငြိမ်းချမ်းရေးရဖို့ မြန်မာနိုင်ငံက ဦးဆောင်လုပ်ရမယ်လို့ ကမ္ဘောဒီးယားနဲ့ ထိုင်းနိုင်ငံခြားရေးဝန်ကြီးနှစ်ဦးကလည်း ဇန်နဝါရီလ ၁၉ ရက်နေ့မှာ ပြောဆိုခဲ့ကြပါတယ်။

Leave a Reply

Your email address will not be published.